【第一次滑雪初體驗．長文慎入】
滑雪之前非常緊張，問哂Friend使唔使請教練呀剩剩，佢哋話淨係想識Basic其實唔使，同溜冰一樣，但去到我哋又淆底，於是喺Instagram Story搞咗個Vote問下人，最後一半人叫我要上堂，一半人叫我唔使，連腦細都投要上堂🤦🏻♀️ 但係佢個堂真係Basic到寫住係「How to stop lesson」，所以都係冇上到，決定靠自己。
好彩喺BB斜嘅位都有好多識中文嘅教練望實我哋呢班友仔(即係好似溜冰場嗰啲職員，不過佢地唔會懶勁咁鏟過嚟嚇你，而係大大力推你上斜)，練練下都識得剎停、轉彎、減速、同跌!!! 咁就掂啦。
正所謂「 初生之犢不畏高」，教練話如果識剎停可以上山試下，而我哋又真係以為自己OK於是好有信心咁坐纜車去初級滑道挑戰，一圓坐纜車滑雪之夢。但上到去見到條斜路勁長腳都震埋，大脾唔出力Hold內八就會光速前進(主要都係因為第一次就算識都好驚驚)，滑咗頭一個斜已經想喊不如碌返落去算數，不過最後跌多幾次就搵到祕訣慢慢滑落去，冇跌斷手腳，只係跌嗰下鏟起哂啲雪，兜面飛過嚟食咗啖雪姐。
果然「最大嘅恐懼，就係恐懼本身」，但再玩多次，我都係乖乖哋上返個堂先，起碼個信心都大啲，失禮哂。
_
係咁依講返聲我有Instagram :
instagram.com/cherryluii
Search